Die naam Gerrit kom van sy grootvader aan moederskant nl. Gerrit van Wyk. Blykbaar was hy in die omgang as Gert bekend en so word sy naam aangegee op sy sterfkennis. Nege jaar later op sy vrou se sterfkennis word sy naam aangegee as Gerhardus.

In 1795 het die V.O.C. die oosgrens van die Kaap verskuif na die Boesmansrivier, ’n boloop van die Groot Visrivier en in 1778 het die Kompanjie, op versoek van veldkornet van Jaarsveld enandere toegestem dat ’n kerk en dorp aangelê kon word en te voorsien in die behoeftes van die inwoners van die omgewing en aldus het die dorp Graaff-Reinet ontstaan. In 1781 het die eerste grensoorlog op die oosgrens uitgebreek en daarna het die Kompanjie besluit om die oosgrens vorentoe te verskuif en om langs die Visrivier te wees. Die trek van die veeboere ooswaarts was toe in volle gang.

Waar Gerrit en sy gade hulle gevestig het net na hul huwelik in 1787 kon nog nie duidelik vasgestel word nie. Waarskynlik is hulle aanvanklik in die Bokkeveld waar hy groot geword het. In 1791 is ’n opname gemaak van die burgers wat hulle in die nuwe streke op die oosgrens bevind het en sy naam kom op die lys (KAB, G.R. 14/112). Tussen die jare 1789 en 1791 moes hulle na die oosgrens verhuis het.

In 1792 word vermeld dat hy woonagtig was op die plaas "Klipfontein gelegen aan die Bosjesmans Rivier" (KAB, G.R. 14/27. 1792). In 1795 laat hulle ’n kind doop te Stellenbosch en in die doopregister word aangeteken dat hy woonagtig was in die distrik van Graaff-Reinet.

In 1819 word hy en sy vrou genoem as getuies by die doop van die tweeling seuns van ’n broerskind van hom, nl. Joachim (b2c7d1). Een van die tweeling ontvang ’n saamgestelde naam waarin die naam van Gerrit ook voorkom. Teen hierdie tyd moes hy hom egter, alreeds in Kaapstad gaan vestig het want een van sy kinders het alreeds in 1811 in Kaapstad in die huwelik getree. Hy het vir ’n geruime tyd in Kaapstad gewoon want hy is eers in 1837 daar oorlede. Hy moes redelik welgesteld gewees het want in Kaapstad was hy "rustend" en moes gelewe het uit inkomstes wat hy op beleggings verkry het. Sy adres word aangegee as Boomstraat en sy dogters is ook vanuit die huis in Boomstraat getroud.

Hy is op 14 Desember 1837 in Kaapstad oorlede, hy was toe 72 jaar oud op sy sterfkennis word sy beroep aangegee as "gentleman".